Како да напишеш CV кој сите ќе сакаат да го прочитаат

CV претставува твојата влезница за интервју.

Затоа…

Не дозволувај мрзеливоста да те спречи да ги прочиташ насоките!

Дали дојде време да напишеш CV?

Го пишуваш првпат во животот или сфати дека твојот сегашен CV бара итно ажурирање?

Без разлика дали бараш пракса или работа, првиот и најважен чекор во целиот процес е да напишеш CV кој ќе го заинтересира читателот и ќе го наведе токму тебе да те повика на разговор.

Ти пишуваме на кои работи треба да обрнеш внимание за да бидеш сигурен дека никој нема да го „фрли твојот CV во ѓубре“.

CV НЕ ТРЕБА ДА БИДЕ ПОСЛОЖЕН ОД ДВЕ СТРАНИЦИ

Целта на CV-то е да го натера регрутерот (или работодавачот) да посака да те запознае за да дознае повеќе за тебе. Нема потреба во CV да ја пишуваш целата своја животна приказна. Малку карикираме, но поентата ти е јасна.

Често се случува за иста позиција да се пријави голем број луѓе. Доколку аплицираш за пракса или почетна позиција, конкуренцијата секогаш ќе биде силна.

Регрутерите и работодавачите често немаат време да ги разгледаат сите пријави. За седум секунди решаваат дали ќе го прочитаат CV-то или не.

Затоа не дозволувај твојот CV да не помине „круг пред првиот круг“ и да остане непрочитан.

CV од една страница е идеален за оние што се на почетокот на својата кариера. Фокусот треба да биде на образованието, волонтерските активности и воннаставните активности во кои си учествувал. Можеш уште да наведеш јазици што ги зборуваш, курсеви што си ги посетувал и слично.

CV од две страници е за оние што веќе пливаат во деловните води. Сепак, доколку можеш концизно да ја сумираш својата кариера на една страница – направи го тоа.

CV МОРА ДА БИДЕ ПРЕГЛЕДЕН

Важно е да размислиш што сè сакаш да вклучиш во својот CV и соодветно да го поделиш во неколку секции (образование, вештини, искуство…). Насловите на секциите истакни ги со подебел шрифт и поголема големина.

Зошто?

Добар дизајн на CV-то ќе му овозможи на регрутерот лесно да ги разбере твоите најважни вештини, искуства и квалификации.

Уште еден совет: истакни ги клучните зборови. Бил ли на пракса во позната компанија? Волонтирал во некоја организација? Бил активен за време на школо/факултет? Учествувал во проект? Говориш повеќе јазици?

Доколку сметаш дека нешто може да те издвојува од другите кандидати – истакни го!

ФОТОГРАФИЈАТА ВО CV МОРА ДА БИДЕ ПРИКЛАДНА

Со години се води расправа дали треба да има фотографија во CV или не. Во многу земји ставање фотографија или година на раѓање во CV не е пракса.

Фотографијата не е задолжителна. Таа може да служи за комплетирање на личниот бренд и за да овозможи регрутерот да формира прв впечаток.

Неколку непишани правила:

1. Фотографијата треба да биде добро осветлена (природното светло е најдобро)
2. Едноставна позадина (еднобојни ѕидови)
3. „Headshot“ фотографија (лице и рамена)
4. Класична поза: рамена опуштени, брада кон камерата, тело благо свртено дијагонално, главата кон камерата

НАВЕДИ ОБРАЗОВАНИЕ И ИСКУСТВО ВО ОБРНАТ ХРОНОЛОШКИ РЕД

Твојата последна позиција е најрелевантна и затоа треба да ја наведеш прва. Истото важи и за образованието.

За секоја позиција наведи: назив, работодавач и период (од – до).

Можеш да наведеш и одговорности и достигнувања. Засили ги точките со силни глаголи и бројки.

Што ако немаш искуство?

Сè што си работел за време на школо или факултет, што може да ги истакне твоите доблести: волонтирање, пракси, хуманитарен труд, групни проекти итн.

ИЗБЕГНУВАЈ ПРЕГОЛЕМО КОРИСТЕЊЕ НА ПОПУЛАРНИ ФРАЗИ

Тимски играч. Мотивиран. Проактивен. Добар работник. Организациски способности.

Регрутерите ги знаат овие фрази наизуст.

Подобро е твојот CV да содржи конкретни детали: проекти, задачи, резултати.

ПРИЛАГОДИ ГО CV ЗА СЕКОЈ ОГЛАС

Прочитај го огласот повеќепати.

Истакни ги деловите што најмногу одговараат на описот. Направи да му „викаш“ на регрутерот: „Еј, јас сум вистинската личност!“

Дури и ако немаш директно искуство, наведи други работи што покажуваат вредност, одговорност и управување со време.

ФОРМАТИРАЊЕ НА CV

• Избегнувај наслов „CV“ или „Биографија“. Наместо тоа – твоето име и презиме.
• Користи читлив фонт: Arial, Calibri, Times New Roman. Големина 10–12.
• Користи точки и јасни размаци за секции.
• Документот зачувај како PDF (освен ако огласот бара друго).
• Име на документ: Ime-Prezime-CV.

Да сумираме:

1. CV долг 1–2 страници
2. Прегледен, поделен во секции
3. Прикладна фотографија
4. Последното искуство прво
5. Минимално користење на популарни фрази
6. Прилагоден на оглас

Доколку сакаш да се запознаеш со дизајн концепти за CV и да видиш примери, можеш да го направиш тоа ОВДЕ.

Се надеваме дека ти помогнавме.

До следното читање,

Твој EasyPass.